نيبو وأرض الفراعنة.. سر القناع الذهبى فى المتحف المصرى بالتحرير

نيبو توقفت عند مدخل القاعة
الضوء انعكس على شىء يلمع فى الداخل
كرم همس:
ده.. ده دهب؟
منصور اقترب ببطء:
مش أى دهب
دخلوا قاعة كنوز تانيس داخل المتحف المصرى بالتحرير
وفى المنتصف
كان القناع
كرم بصوت منخفض:
هو ده.. قناع الملك توت عنخ آمون؟
منصور ابتسم بخفة:
لا
ده قناع ملك تانى
عظيم لكن فى ناس متعرفوش
كرم:
مين؟
منصور:
الملك
بسوسنس الأول
كرم باستغراب:
أول مرة أسمع عنه!
منصور:
وده سر الحكاية
نيبو تقدمت خطوة
انعكاس الذهب ظهر فى عينيها
منصور:
بسوسنس الأول كان ثالث ملوك الأسرة الحادية والعشرين
حوالى «1047 ـ 1001»
حكم من مدينة تانيس فى شرق الدلتا
كرم:
طب ليه قناعه ذهبى زيه زى توت عنخ آمون
ومش مشهور زيه؟
منصور خفض صوته:
لأن اكتشاف مقبرته حصل سنة 1940
فى وقت كانت فيه الحرب العالمية التانية مشتعلة
فالعالم كان مشغول بالحرب
مش بالذهب
كرم بدهشة:
يعنى مقبرته كانت كاملة؟
منصور:
أيوه
اتكتشفت سليمة تقريبًا
وكنوزها أكتر من 2000 قطعة
ذهب خالص وقلادات وأساور وحلى نادرة
لدرجة إنهم بيسموها
ذهب تانيس
كرم اقترب من القناع:
هو كله دهب فعلًا؟
منصور:
ذهب خالص
مطعّم باللازورد ومعجون زجاج ملون
شايف غطاء الرأس؟
ده «النمس»
وفوقه الكوبرا المقدسة رمز الحماية الملكية
كرم:
والدقن دى؟
منصور:
لحية ملكية مضفرة
رمز للألوهية بعد الموت
نيبو جلست أمام القناع بهدوء
كأنها تحرسه
كرم:
طب ليه بيسموه الفرعون الفضى؟
منصور:
لأنهم لقوا فى مقبرته كمية فضة ضخمة
والفضة وقتها كانت أندر من الذهب
صمت لحظة
كرم:
يعنى القناع ده مش أقل أهمية من قناع توت عنخ آمون؟
منصور نظر للقناع طويلًا:
أبدًا
لكن بعض الكنوز
بتختار الوقت الغلط علشان تظهر
فجأة
نيبو رفعت رأسها
نظرت نحو تمثال ضخم فى نهاية القاعة
كرم:
نيبو شايفة إيه تانى؟
منصور ابتسم ابتسامة غامضة:
واضح إن جولتنا لسه مكبرتش كفاية
كرم:
مكبرتش إزاى؟
منصور أشار بعيدًا:
المرة الجاية
حكايتنا مع أكبر تمثال فى المتحف المصرى بالتحرير
لملكة عظيمة
نيبو بدأت تتحرك
كرم بصوت مليان فضول:
ملكة؟
مين الملكة دى؟
منصور وهو يسير خلفها:
المرة الجاية
هتعرف كل حاجة يا كرم